Mamma Mia in Stanford

 “Soos belowe tydens Laerskool Okkie Smuts se prysuitdelingsaand van 2013, het ons vanjaar ‘n ‘musical’ aangepak, en was dít nou vir jou groot pret gewees,” vertel Felicity Beukes van Laerskool Okkie Smuts.

“Na maande se ‘blood, sweat and tears’ was dit uiteindelik tyd om ons eie Mamma Mia op die planke te kry.” Sy sê die opgewondenheid, maar ook die bang wees, was groot aangesien daar op die Donderdagaand buite die gordyne ‘n saal vol mense gesit en wag het. Tydens die Gala-aand op die Vrydagaand was die saal nie so vol nie, maar die gaste het vir ‘n drie-gang maaltyd by pragtige versierde tafels aangesit. Wat die opvoering des te meer besonders gemaak het, is dat alle leerders, met die uitsondering van 6 nuwe leerders, aan die musiekblyspel deelgeneem het.  

Die hoofkarakters is deur die Gr 7’s vertolk, aangesien dit hulle laaste jaar is in die laerskool is. Die res van die leerders is almal in klasse opgedeel wat met elke liedjie die verhoog laat lewe het, ingesluit danspassies, draaie en swaaie.

“Baie dankie aan die ouers en gemeenskap wat die skool so wonderlik ondersteun het,” sê Felicity. “Ons het sowat R15,100 wins gemaak en elke leerder verdien ‘n groot applous vir sy/haar deelname - julle was ware sterre!”

Hardus Botha

Die Gr 5’s tydens hulle optrede in die musiekblyspel, Mamma Mia
Regs is Sonja Louw in haar rolvertolking as “Sophie”