Vanaf 21 tot 23 November word ‘n behoorlike, maar dankbare Feesnaweek deur die NG-gemeente ter herdenking van hulle 70ste bestaansjaar gereël. “Alle gemeentelede, besoekers, familie en vriende word uitgenooi om te deel in hierdie heuglike gebeurtenis,” sê die organiseerders. “Kom deel in die feesvieringe en dat ons daardeur ons Hemelse Vader dank vir 70 jaar van gemeente wees, ongeag die omstandighede.”
Vrydag, 21 November is daar ‘n gemeentekonsert met gratis toegang, maar kaartjies moet vooraf by die Kerkkantoor gekry word, aangesien sitplekke beperk is. Die program is met plaaslike kunstenaars, wat vir skaterlag sal sorg, gevul, met plaaslike kore wat ook in aksie sal wees. Plaaslike storievertellers soos SD Fourie, Johan de Villiers en André Moolman sal ook optree. Die Baardskeerdersbos Boere-orkes, asook Eddie Barnard, tel onder die musiekmakers gedurende die aand.
‘n Hoogtepunt van die aand sal ‘n uittreksel uit die gewilde en suksesvolle Sneeuwitjie en die Sewe Dwergies wees. Verversings sal deur die Jeugkommissie te koop aangebied word. Saterdag, 22 November is daar speletjies vir oud en jonk soos 70 jaar gelede onder leiding van Piet van Zyl, met vele pryse om te wen. Vure vir ‘n gesellige bring-en-braai en saamkuier sal reeds vanaf 10:00 brand.
Gedurende die naweek sal oulike en handige wynsakke met ‘n plaaslike tema teen R30.00 te koop aangebied word. Op Sondag, 23 November sal dr Bobo van Zyl die Erediens waarneem, met al drie die predikant wat betrokke sal wees. ‘n Spesiale Feeslied vir die geselligheid is deur Aletta Lochner geskryf en die amptelike “ingebruikneming” daarvan sal tydens die Erediens geskied. ‘n Gedenksteen sal ook na afloop van die Erediens onthul word. Sondagaand word die naweek afgesluit met die gemeente se immergewilde Kerssangdiens, waarna verversings deur die Vrouediens in die saal aangebied sal word.
Navrae rakende die opwindende Feesnaweek kan aan die Kerkkantoor by 028-384-0510 gerig word.
Hardus Botha
