Andries Adams (68) is op 19 November 2014 in sy huis in Blompark oorlede. “Ek het nog gedurende die voormiddag met hom gesels, waarna ek dorp toe gery het, maar voordat ek daar aangekom het, is ek geskakel om dringend terug te keer huis toe,” vertel sy eggenote, Magrieta Adams, Bestuurder: Silwerjare Dienssentrum en Oak Grove Nasorgsentrum. “Met my aankoms tuis, was hy reeds oorlede.”
Andries is op 6 Oktober 1946 in Hawston gebore, maar was bykans sy hele lewe ‘n Gansbaaier. Hier was hy vir sowat 32 jaar ‘n visserman, “en vir die volle tydperk het hy op dieselfde boot ge-trawl,” sê Magrieta. Sedert 2005 het hy op kontrakbasis as verwer vir homself gewerk. Andries en Magrieta is 41 jaar gelede op 4 Maart 1973 in Gansbaai in die huwelik bevestig. Twee kinders is uit die huwelik gebore, Ursula (45) getroud met Ceril Natal en Andrew Adams (41). Die egpaar het ook ‘n pleegdogter, Stephany Adams (23) en in totaal het hulle 7 kleinkinders. Andries het as ‘n beskeie, maar hardwerkende gemeenskapsmens bekend gestaan. Voorheen het hy onder andere op die Direksie van Vissermanne, die Munisipale Raad en die Beheerliggaam van Herberg-aan-See gedien, asook as voorsitter van Gansbaai Primêr se Beheerraad. Andries was ‘n stigterslid van Black Leaves Rugbyklub, waar hy ook as voorsitter gedien het. Hy was ook die eerste verkose diaken van die VGK-gemeente in Blompark. “Wat my droom oor Silwerjare Dienssentrum en Oak Grove Nasorgsentrum betref, was Andries ‘n ware steunpilaar en het in alle opsigte gehelp om daardie droom te kon bewaarheid,” vertel Magrieta. Andries laat sy eggenote, Magrieta, 1 seun, 2 dogters, 1 skoonseun en 7 kleinkinders agter.
‘n Roudiens sal op Saterdag, 29 November 2014 om 09:00 aan huis van Magrieta gehou word, met ‘n tweede roudiens om 10:00 in die VGK-kerkgebou wat deur ds Dirk van Dyk gelei sal word.
Hardus Botha
