Ouma Marie 90

 “Ouma Marie du Toit het op 1 November 2014 ‘n groot makietie gehou om haar 90ste verjaardag te vier,” vertel haar dogter, Rialet Wood, ‘n voormalige Maatskaplike Werker van Gansbaai Maatskaplike Dienste.

“Sowat 100 familie-lede en vriende het die geleentheid saam met haar gevier en volgens inligting is sy tans die langslewende vroulike Gansbaaier wat in Gansbaai gebore is.” Sy is op 1 November 1924 in Gansbaai gebore en is die oudste dogter van Andries Moolman en Maria Germishuys. In haar jong dae was sy beter bekend as Mara. Sy is in haar grootouers, Andries en Annie Moolman se legendariese hawe-huis, wat deur vele skilders geskilder is, gebore. Ouma Marie het met Gallie du Toit van die plaas Droëkloof in die Rüens in die huwelik getree. Drie seuns en een dogter is uit die huwelik gebore. Sy spog met 9 kleinkinders en 8 agterkleinkinders.

Na die afsterwe van haar eggenoot het sy vir etlike jare in Kleinmond gaan woon en daarna vir 15 jaar in die Lettie Theron Tehuis in Hermanus, waar sy ‘n bedrywige lewe gevoer het. Ouma Marie was by verskeie aktiwiteite in die Tehuis betrokke en staan daar nog steeds bekend as “Marie Pannekoek” as gevolg van pannekoeke wat sy gereeld in haar woonstel as fondsinsamelingsprojekte vir die Tehuis gebak het. Gedurende Junie 2010 het sy by haar dogter in Gansbaai kom woon en is sedert Augustus 2012 ‘n inwoner van Huis Breda in De Kelders.

“Haar gesondheid  is redelik goed, alhoewel sy nie meer so beweeglik is nie en die gehoor ook nie meer so goed is nie,” vertel Rialet. “Aanvanklik wou sy niks weet van ‘n groot partytjie nie en haar keuse was om eerder op ‘n stoel alleen langs die see te gaan sit!” Dit blyk dat die familie van heinde en verre se opgewondenheid só groot was, dat sy tog tot ‘n behoorlike partytjie ingestem het en dit sommer terdeë saam met hulle geniet het.

Hardus Botha

Ouma Marie du Toit wat op 1 November 2014 die rype ouderdom van 90 bereik het, sit hier saam met drie van haar agterkleinkinders, Mikayla du Toit, Lica Botes en Carle Botes.
Die huis van Andries en Annie Moolman, Ouma Marie du Toit se grootouers, waarin sy gebore is en wat op vele skilderye pryk