“Ons het vanjaar besluit op ‘n gesellige middagete by die Light House Tavern as ons Jaareindfunksie, met Dirk Laurie wat die gaste op ‘n vindingryke manier besig gehou het,” vertel Annemarie du Plessis, voorsitter van Gansbaai Leeskring.
Die groep getroue “boekwurms” het die geleentheid terdeë geniet en heerlik saamgekuier. Hierdie groep is gelukkig nie regtig net ‘n groep “boekwurms” nie, maar wel getroue lesers en besprekers van vele interessante boeke deur knap skrywers. Hulle sorg ook vir gereelde sprekers wat hul eie boek of boeke bespreek wat te alle tye op interessante en leersame wyses byeenkomste neerkom. Ons beplan ‘n veelsydige en interessante program vir 2015,” vertel Annemarie. Sy sê die volgende boeke gaan onder andere bespreek word: Die Dooies Leef deur S.D. Fourie, Die Bundels van Carine Badenhorst, A History of God deur Karen Armstrong, Americanah deur Chimamanda Ngozi Adichie, Valsrivier deur Dominique Botha en andere.
Gansbaai Leeskring se byeenkomste vind altyd op die 3de Dinsdag van die maand om 10:00 in die Biblioteek plaas. Kennis kan nou reeds van 2015 se datums geneem word: 17 Februarie, 17 Maart, 21 April, 19 Mei, 16 Junie, 21 Julie, 18 Augustus, 15 September, 20 Oktober en 17 November. Sprekers sal nader aan die spesifieke datums bekendgemaak word, aangesien dit soms gebeur dat ‘n persoon bespreek word, maar weens omstandighede nie daar kan wees nie en ‘n ander spreker moet gereël word.
Vir navrae rakende Gansbaai Leeskring, kan Annemarie by 082-486-0135 geskakel word, of stuur ‘n e-pos aan haar by pvduplessis@vodamail.co.za.
Hardus Botha