Toe Judas uit is, sê Jesus: “Nou word die Seun van die mensverheerlik, en GOD word deur Hom verheerlik.” (Joh. 13:31)
Het jy al ooit gewonder hoekom só baie dinge gebeur wat jy nie verstaan nie? Hoekom onskuldige kinders gemolesteer word en goeie mense vermoor word? Hoekom kry mense kanker en dan na baie gebede en medisyne sterf hulle in elk geval? In jou lewe gebeur daar baie dinge wat hartseer en ongeluk veroorsaak, nê?
As gelowiges wat die Bybel ken en verstaan, weet ons dat sonde die wêreld verskeur en baie pyn en ellende veroorsaak. Ons weet ook dat ons ’n baie groot aandeel het aan dinge wat met ons gebeur as gevolg van die verkeerde besluite wat ons geneem het. Tog is dit die slegte dinge wat met goeie mense gebeur wat ons die meeste kwel. Ons kan dit nie verstaan nie. Hoekom laat GOD dit dan toe?
In hierdie teksvers en gedeelte uit Johannes 13 het daar vir my ’n baie duidelike antwoord gekom. Ek hoop jy gaan dit ook ontdek. Jesus leer en onderrig vir 3 jaar al Sy dissipels met al Sy kennis en liefde moontlik. Hy leer hulle van die Vader en wys hulle hoe om te lewe soos die Vader wil hê. Tog verraai Judas vir Jesus vir ’n klein sakkie vol geld. Wat is Jesus se reaksie? Hy sien die groter prentjie. “Nou word die Seun van die mens verheerlik, en GOD word deur Hom verheerlik.” GOD word verheerlik! Alles gaan oor GOD se heerlikheid en Sy eer! Maak nie saak wat Judas, Petrus en al die ander dissipels gedoen het nie – GOD word nog steeds verheerlik. Wat sê dit vir jou? NIKS kan GOD se heerlikheid vernietig nie! NIKS wat gebeur mag die fokus wegneem van die ware doel van ons lewe, naamlik om GOD te verheerlik nie.
As jy deur swaar en moeilike tye gaan – ONTHOU: GOD word VERHEERLIK! Prys Hom!
“Maar wanneer iemand ly omdat hy 'n Christen is, moet hy hom nie daaroor skaam nie. Inteendeel, as draer van daardie naam moet hy GOD verheerlik.” (1Pet 4:16)
As jou siekte nie weggaan nie – ONTHOU: VERHEERLIK GOD daaroor! Bly dankbaar!
Ons is mos nie gered van ons sonde sodat GOD ons nou meer geld, beter gesondheid of groter huise kan gee nie. ONTHOU: Ons is hier op aarde om Hom te verheerlik! Alles gaan oor Hom!
Al gaan ons ook deur ’n dal van doodskaduwee (vervolging, honger, armoede, gevaar of swaard (Rom 8:31-39) ons moet aanhou om Hom te verheerlik!
Van nou af wil ek GOD loof en verheerlik oor alles wat gebeur. Goed of sleg. Verstaanbaar of nie. Ek gaan ophou vrae vra wat net aan GOD se Almag en Sy liefde krap. Wat meer moet ek verstaan as dat Hy Sy Seun in my plek laat sterf het sodat ek beslis deel het aan die ewige lewe? Kyk weg van jou persoonlike dinge en hou jou oë op Hom gevestig - en Hy sal jou deur elke moontlike situasie lei sodat jy.......HOM KAN VERHEERLIK!
