Gabriël Petrus Vermeulen (80), beter bekend as Gallie, is op 4 Februarie 1934 in Gansbaai gebore. Sy vader en moeder was Danie en Baby Vermeulen wat ook die “Spreeugate” gedurende die veertigerjare self gebou het, waar Crazee Store vandag is.
Gallie vertel dat hy met die bouwerk gehelp het en dat dit die eerste dubbelverdieping-gebou in Gansbaai was, met sy pa wat die destydse “Maré-Dané” as Algemene Handelaar bedryf het. Die kompleks is later in woonstelle omskep. Gallie het op die plaas “Strandskloof” grootgeword en in Uilenkraalsmond skoolgegaan. Die enigste onderwyser was ‘n ene Louis Fourie, wat ook die eerste huis destyds in Franskraal besit het.
“Ek onthou hoe ons kaalvoet oor die berg vanaf Strandskloof skool toe gestap het en ook gereeld harders getrek het,” vertel Gallie. Hy is die enigste oorlewende uit ‘n totaal van 3 dogters en 6 seuns. Sy broer, wyle Jan Vermeulen, het die destydse kafeetjie, die “Ting-Tong”, ook in die “Spreeugate”, bedryf en Gallie vertel dat dit ‘n baie gewilde kuierplek vir jongmense was.
Gallie is met Petro getroud en het drie seuns uit sy eerste huwelik: Danie (53), eienaar van die bekende “Biltong & Nut Corner” by Gansbaai Superspar se ingang; Francois (51), ‘n besigheidsman van Robertson; Gerhard (49), ‘n besigheidsman van Graafwater. In totaal spog Gallie met 7 kleinkinders en 4 agterkleinkinders.
Gallie se beroepslewe het as Bosbouer vir sowat ‘n jaar lank begin, waarna hy vir ‘n paar maande in Saldanha “ge-trawl” het. In 1952 aanvaar hy diens by die destydse Suid-Afrikaanse Spoorweë en Hawens waar hy vir 28 jaar werk, tot en met sy aftrede in 1980.
Sedertdien is hy terug in Gansbaai waar hy rustig vir die afgelope 34 jaar woon. Die 80-jarige Gallie verkeer steeds in goeie gesondheid en is nog net so lief om self in sy mooi tuin te werk en ook self die gras te sny.
Hardus Botha