Dries se RSG Drama

“Ek is dankbaar dat ek vir die tweede jaar onder die eerste tien uit ‘n 100 plus inskrywings vir RSG se Drama-kompetisie geëindig het,” vertel Dries van Heerden van Franskraal. “Alhoewel ek vanjaar weer onder die eerste tien geëindig het en nie onder die eerste drie nie, het RSG besluit om wel my 2014-drama uit te saai.”

Hierdie groot gebeurtenis vir Dries en sy eggenote, Susan, vind volgende Donderdag, 18 Desember 2014 om 20:00 plaas. Skakel gerus in op RSG en luister na Dries se “Offer van die Seegod”. In kort handel die drama oor die verhoudingsdilemma van ‘n gesin binne die raamwerk van perlemoensmokkelary. “Die keuse tussen moet ek of moet ek nie, asook die spanning van só ‘n keuse en die gevolge daarvan.”

Dries se mentor was Eben Cruywagen en die regisseur van die uitsending is Joanie Combrinck. “Perlemoensmokkelary is welliswaar al ‘n gevestigde onderwerp om oor te skryf, maar Dries se drama het ‘n interessante kinkel,” het Kobus Burger, Uitvoerende Hoof: RSG Radio Drama gesê.

Dries sê dit is harde werk en hy het sowat 8 maande aan hierdie drama gewerk. “Dit is skryf, instuur, herskryf, instuur en herskryf…” Hy sê dat veral die navorsing was baie moeilik, aangesien die samewerking ten opsigte van gesprekvoeringe byna nul is en dit moeilik is om relevante inligting te bekom.

Die egpaar beplan ‘n gesellige aandjie vir die luister van die drama. Hulle noem dit ‘n “Kuns, Kultuur en Kuieraand” en daar sal spasie vir sowat 20 gaste wees wat wil kom saamkuier, terwyl Eddie Barnard se “One Man Band” en sy Perlemoenliedjie ook teen woordig sal wees.

“Ons beplan ook ‘n kunsuitstalling vir 19 tot 22 Desember vanaf 10:00 soggens en ons noem dit die Skildertuin-Tee en almal is welkom om te kom inloer,” sê Susan.

Vir navrae en/of besprekings vir die 18de, of navrae oor die kunsuitstalling, kan die egpaar by 082-823-4872 geskakel word.    

Hardus Botha

Dries van Heerden van Franskraal wie se drama binne enkele dae oor RSG uitgesaai sal word