Opgewonde vakansiegangers het die eerste been van Mr Video in Gansbaai se kompetisie gewen - ‘n Blue-Ray Videomasjien. Kobus, Elize en Etienne van Zyl, asook ‘n vriend van Etienne, Ruben du Preez van Kameeldrift naby Hartbeespoortdam in die Noordwes Provinsie, het saam met Elize die prys in ontvangs geneem.
“Die reeks kompetisies is vir Mr Video se 20ste verjaardagvieringe,” vertel Desiree van Zyl, Bestuurder: Gansbaai Mr Video. “Dit is ons vierde jaar van vakansie in Gansbaai en beslis ook nie die laaste nie,” vertel Elize. “Ons het agt kaartjies oor die tydperk gehad en elke keer gebid as ons dit in die houer gooi - dankie Jesus!”
Die gesin vertel van ‘n interessante gebeurtenis wat hulle verlede jaar oorgekom het: Hulle het soos gewoonlik 2 DVD’s by Mr Video uitgeneem, maar Etienne het dit per abuis op die motor se dak vergeet. Onnodig om te sê die DVD’s was verlore en hulle moes dit betaal. Desiree sê dat die een verlore DVD maande na die tyd deur iemand terugbesorg is en die ander een ook ‘n maand of wat later. Sy het die gesin gekontak om die geld terug te betaal, maar hulle het laat weet dat sy iemand in die omgewing met die geld moet “bless”. Wat ‘n mooi gebaar!
“Vanjaar is ons beloon vir verlede jaar se verlies as gevolg van ‘n bonafide ongeluk,” sê Elize.
Hardus Botha
