Die DA se raadslid vir Wyk 2, rdl Riana de Coning, het op 18 Desember ‘n baie spesiale Kersete vir Gansbaaidorp en Blompark se bejaardes by Silwerjare Dienssentrum gereël. Mnr Masizole Mnqasela (Lid van die Provinsiale Parlement) en ook een van die eregaste, het die borgskap vir die geleentheid vanaf die Minister van Sosiale Ontwikkeling: Wes-Kaap, min Albert Fritz, verkry. Nog eregaste was raadsvrou Nicolette Botha-Guthrie (Overstrandse Uitvoerende Burgemeester) en raadslede Dudley Coetzee en Moira Opperman, asook van die organiseerders wat vir Riana bygestaan het.
“Dit was ‘n baie spesiale geleentheid vir almal, aangesien daar op alle bejaardes in Gansbaai-dorp en Blompark gefokus is,” het Riana gesê. Een van die gaste, Betsie van der Merwe (88) van De Kelders, het haar nie deur hoë politici laat afskrik nie. Sy het doodluiters na die eregaste op die verhoog gegaan en spontaan vir mnr Mnqasela en raadsvrou Botha-Guthrie hulle handtekeninge op haar program gevra. Behalwe vir ‘n prestige Kersete, het elke bejaarde ook ‘n kersgeskenkie (‘n pakkie gemengde soetkoekies) ontvang. Riana die gaste ook met ‘n Kersklapper verras, wat met kinderlike vreugde en opgewondenheid geskiet is.
Mnr Mnqasela, asook raadsvrou Botha-Guthrie het in hulle toesprake na etlike prestasies deur die Overstrandse Munisipaliteit verwys en die bejaardes ook vir hulle ondersteuning en goeie samewerking bedank. Hulle het die bejaardes ‘n Geseënde Kersfees en Voorspoedige Nuwe Jaar toegewens.
Hardus Botha
