Kersvader Scattered Links

Al gehoor van “Kersvader Scattered Links”? Dit mag eienaardig op die oor klink, maar dit was weer tyd vir Gansbaai se bekende motorfietsklub, die Scattered Links, Overberg Chapter, om Kersvader te speel.

Die groep is bekend vir hul vele liefdadigheidsprojekte en het Desembermaand met helder oranjekleurige kartondose in etlike besighede in die dorp afgeskop. Vele items, veral toilet- en kruideniersware, is op hierdie wyse ingesamel. “Vanjaar het ons besluit om die een gedeelte van die donasies aan Gansbaai se Helpende Hand te oorhandig, met die res wat gedurende Januarie 2015 aan die Gansbaai Elimhuis oorhandig sal word,” vertel Juanita Maree, een van die organiseerders en eggenote van die voorsitter, Pieter Maree. Die motorfietsers het ook die “Kersliggie-aanskakelingsaand” benut deur worsrolletjies ten bate van liefdadigheid te verkoop. “Helpende Hand mag nie ‘bedel’ en vra nie, daarom is spontane optrede en omgee soos hierdie werklik ‘n riem onder hart vir ‘n mens,” het ‘n emosie-belaaide Maretha Geldenhuys van Solidariteit Helpende Hand se Gansbaai-tak gesê. Die motorfietse het verlede week dreun-dreun by Maretha ingetrek, maar dié keer saam met ‘n volgelaaide bakkie. Trane van dankbaarheid het gevloei toe sy die groep bedank het.

“Dit is ‘n wonderlike gebaar vir die nood in ons omgewing en julle optrede is vir my ‘n wonderlike definisie van opregte omgee teenoor diegene wat nie dieselfde voorregte as ons geniet nie.” Hierdie motorfietsers van Gansbaai is beslis nie “tange op motorbikes” nie. Hulle is gerespekteerde inwoners met etlike van hulle wat hul eie besighede bedryf - en aan ruim harte vir diegene in nood, is daar by hulle geen tekort nie.

Hardus Botha

 ‘n Deel van Gansbaai se motorfietsklub, die Scattered Links, tydens die oorhandiging van vele hulpitems aan Solidariteit Helpende Hand se Gansbaai-tak met Maretha Geldenhuys agter in die middel