BARC Nuus

Vir vakansiegangers wat nie weet nie, BARC staan vir Birkenhead Animal Rescue Centre en verrig ‘n enorme taak vir die beskerming van diere. BARC is ‘n nie-winsgewende organisasie en is grotendeels afhanklik van donasies en skenkings. Gereelde fondsinsamelingsprojekte word aangepak, terwyl hulle ook die Tweedehandse Winkel op die hoek van Hoof- en Korporasiestrate bedryf ten einde fondse vir oorlewing te bekom.

“Die winkel het ook onder die swak ekonomiese toestande deurgeloop, terwyl dit ‘n belangrike bron van inkomste is, maar ons verkope is besig om weer mooi aan die gang te kom,” vertel Annalie Jonker, Bestuurder van BARC. “Ons maak deurgaans staat op donasies van die publiek ten opsigte van klere, skoene, kombuisware, gordyne, beddegoed, ornamente en enigiets wat tuis in die pad is.” Twee gratis Sterilisasie-veldtogte is vanjaar geloods, waartydens 203 diere op BARC se koste gesteriliseer is. Twee ekstra hokke is aangebou, terwyl nog drie in beplanning is, asook die vergroting van die Cattery (kattehok).

Geldelike donasies kan by die winkel of by die hokke gegee word, waar ‘n kwitansie uitgereik sal word. Andersinds kan dit direk in BARC se bankrekening inbetaal word: Nedbank; Rekeningnommer 1498103006; Takkode 198765; Verwysing: Donasie. BARC se hokke kan gerus gedurende weeksdae tussen 09:00 en 10:00 besoek word, asook Saterdae tussen 09:00 en 10:00.

Die hokke is in Voortrekkerstraat op pad na Gansbaai se Stortingsterrein. BARC bied ook “losies” aan honde, maar slegs wanneer die eienaars met vakansie gaan. “Baie dankie vir vele skenkings soos dierekos, komberse en speelgoed vir die katjies en die honde in die hokke, dit word opreg waardeer,” sê Annalie. “Dankie ook aan persone wat positiewe advertensies van diere wat huise soek op ons Facebook-blad deel en verder versprei.” BARC se Veldwagter, Gavin Hughes, woon op die perseel, wat verdere inbrake verhoed waar honde gesteel word vir hondegevegte of om te verkoop, met vervalste teelsertifikate.

Navrae en/of donasies: Annalie Jonker by 082-826-0631; Diere-probleme: Gavin by 083-742-3903.

Hardus Botha

Die voorkant van BARC se hokke op pad na die Stortingsterrein