Olga Swanepoel van Perlemoenbaai het die voorreg geniet om haar “voltallige kroos” te kon ontvang. Die vyf dogters wat vir haar Kersvreugde gesorg het, is Erica (Worcester), Reinette (Perlemoenbaai), Elsabe (Johannesburg), Ronel (Stellenbosch) en Benita (Worcester).
Olga se kleindogter en Reinette se dogter, Mareina, is tydens hulle besoek op 20 Desember in Hermanus met Chris Cronje in die huwelik bevestig, met die bruidspaar wat altwee in Pretoria woon. Tussen die vyf dogters is Olga die trotse ouma van 13 kleinkinders en ouma-grootjie van 3 agterkleinkinders. Daar is ook geen einde aan Olga se energie nie - sy is ‘n bekende kunstenaar in die omgewing. Haar kunsgroep, Kwaskenades Kunsgroep, is sowat 6 jaar gelede gestig en sedertdien het sy al etlike kunsstudente opgelei. Ná ‘n suksesvolle uitstalling in Julia Barlow se Lighthouse Tavern op die Danger Point-pad, het Olga en haar studente besluit om soortgelyke uitstallings kwartaalsgewys daar aan te bied.
“Ek verskaf slegs basiese opleiding, raad en advies aan my studente, maar verkies om hulle vryheid van styl toe te laat, aangesien geen kunstenaar oor dieselfde styl beskik nie,” sê Olga.
Die twee pragtige skilderye van vreugdevolle Engele op die sykante in die Pretoriussaal tydens die onlangse Kersmark, is ook deur Olga gedoen. “Ek het probeer om die dieper kern van Kersfees vas te vang. Die geboorte van dié Kind, asook die blye vreugde wat dit vir die mensdom gebring het,” vertel Olga. Belangstellendes in haar of haar studente se skilderye, kan haar by 082-444-9172 skakel.
Hardus Botha
