Johan-Stefan van Wyk (8), is ‘n Gr 3 leerder aan die Laerskool Brackenfell en is ‘n gereelde vakansieganger in De Kelders. Hy kom gereeld gedurende skoolvakansies saam met sy oupa en ouma, Johan en Stienie Marais van Rawsonville, na hul vakansiehuis in De Kelders. Hier vergeet Johan-Stefan van skoolgaan en is die ene opgewondenheid oor De Kelders, Gansbaai en die omgewing. Bure van Johan en Stienie in De Kelders neem Johan-Stefan gereeld agtermiddae saam na Gansbaai hawe waar daar met die honde gestap word.
Tydens daardie uitstappies is daar niks wat sy wakker oë ontglip nie en sy ondersoekvermoeëns oorskadu selfs dié van die honde wat saamgeneem word. Ondanks sy belangstellende en lewendige geaardheid, beskik hierdie jongseun oor pragtige goeie maniere, beleefdheid en gehoorsaamheid. Alles op en langs die ou hawe-muur word ondersoek en hy “ontdek” elke middag iets anders wat hom interesseer. ‘n Hoogtepunt vir hom was verlede Sondagaand toe hy saam met dieselfde bure na Hoofstraat se Kersliggies gaan kyk het. Hy was oorstelp van vreugde en opgewondenheid en kon nie ophou kyk en vrae vra nie. Elke voorstelling moes ontleed word om seker te maak hy weet wat die liggies voorstel. Met die gadeslaan van drie spesifieke wonings, was dié jongeling stomgeslaan en hy het elke uitbeelding sogvuldig bekyk en daar moes foto’s vir Afrika geneem word.
Nou-ja, ‘n jong besoekertjie of nie, Gansbaai en omgewing sal sonder twyfel goeie “word-by-mouth” advertensie van hom af in Brackenfell kry.
Hardus Botha
