Elke sekonde is 'n sekonde van GOD se genade!

“Barmhartig en genadig is die HERE, lankmoedig en vol liefde.” (Ps 103:8). “Uit sy oorvloed het ons almal genade op genade ontvang.” (Joh 1:16) . “Maar hulle word, sonder dat hulle dit verdien, op grond van sy genade vrygespreek vanweë die verlossing deur Jesus Christus.”  (Rom 3:24) 

Het jy geweet dat alles wat jy is, alles wat jy besit, alles wat jy al bereik het, ja elke dag se gesondheid, vreugde en genot, alles ’n daad van GOD se genade is? Ons as mense staan so maklik elke dag op en sê: “Vandag gaan ek dit of dat doen, môre gaan ek soontoe en ek gaan eendag by die see aftree.”  Maar eintlik kan ons niks sê of doen as dit nie vir GOD se onuitspreeklike gróót genade is nie.

Een Saterdagmiddag, op my 15de verjaardag, het ek gelê en boek lees toe my pa my deur die kamervenster roep om te kom gras sny. Ek het sonder respek geantwoord dit was my verjaardag en hy moet my broer vra. In millisekondes was hy in my kamer en het my die pak slae van my lewe gegee terwyl hy my aan my hemp en broek na buite boender. Ek moes in die tuin werk totdat die maan en sterre begin skyn het. Toe ek in die huis instap was hy en ma en my broers reeds aangetrek om uit te gaan. Pa het gesê ek moet gou stort en toe het hy my vir my verjaardag uitgevat vir ’n heerlike aand van eet en put-put speel. Verstaan jy? Vroeër die dag het hy my gegee wat ek verdien het. Later die aand het ek gekry wat ek nie verdien nie. Dit is wat genade doen!

Die aarde sou al lankal vernietig gewees het as GOD regtig die mense dadelik gestraf het vir wat hulle doen. Maar van die begin af was die HERE GOD met die mens geduldig en het nooit opgehou om die verhouding wat deur sonde stukkend gebreek is van Sy kant af te herstel nie. Verstaan één saak net weereens baie goed: GOD is ’n regverdige GOD wat alle sondes straf – maar Hy het besluit om al Sy kinders se sonde te straf deur Sy eie Seun aan die kruis in ons plek te laat sterwe. Daarom moet ons weet dat GOD die sondaars wat Jesus Christus as Verlosser aangeneem het en Sy Naam bely, sal red van die ewige dood. (Joh. 1:12; 3:16; Rom. 10:8-10) DIT IS GENADE! Uit genade is julle gered! (Efes. 2:8). Jy kan nie bestaan as dit nie vir GOD se genade is nie!

Kom ons probeer om hierdie jaar meer en meer te leef soos mense wat reeds deur GOD begenadig is. GOD sê self vir Paulus as hy om iets vra wat hy nie kry nie: “My genade is vir jou genoeg.” (2 Kor. 12:9) Bewys jy dan ook meer genade aan die mense wat jou irriteer en jou lastig val. Só vloei GOD se genade al verder en verder deur die wêreld!