“Baardskeerdersbos Huiseienaarsvereniging het hul 10de Algemene Jaarvergadering gedurende Desember 2014 gehou,” vertel Helena Swart, voorsitter. In haar voorsittersverslag het sy eerstens alle lede bedank vir hul getroue ondersteuning en bywoning van vergaderings, en daarna vir rdl Dudley Coetzee verwelkom en bedank vir sy volgehoue ondersteuning. Helena het hoogtepunte van die 10-jarige bestaan van die BBHEV uitgelig en gesê dat al die projekte nie suksesvol afgehandel sou kon word sonder finansiële ondersteuning deur die Overstrandse Munisiplaiteit, Gansbaai Administrasie nie, en die Areabestuurder, Kat Myburgh, uitgesonder wat altyd bereid is om te help.
Enkele hoogtepunte is soos volg deur haar uitgelig: Basiese dienste wat deur die munisipaliteit gelewer is; die teer van Protea-, Kerk- en Granaatlane; die Waterprojek se suksesvolle afhandeling; die Ruimtelike Ontwikkelingsraamwerk wat deur die Raad goedgekeur is; die Vodacom-toring; Straatnaamborde; B’Bos se Gemeenskapsaal en die vestiging van tuine; Uitklip van Leivoor te Proteastraat; Opgradering van pad (Fynbosroete) en nog vele ander projekte wat deur toegewyde bestuurslede aangepak en afgehandel is.
“B’Bos staan nog in sy kinderskoene van ontwikkeling, maar ons as inwoners wil eintlik nie hê dat ons dorp ‘n tweede Greyton word nie - ons wil steeds ons landelike gevoel behou en met die dat B’Bos onder Departement Landelike Ontwikkeling val, sal dit moontlik wees om trosbehuising en hoë geboue wat die uitsig bederf en al sulke voorstedelike dinge, van ons voorstoep af weg te hou,” sê Helena. “Nie dat ons teen ontwikkeling gekant is nie, maar ons moet ook die belange van ons inwoners beskerm, want wie wil nou elke dag teen ‘n buurman se muur vaskyk, terwyl ons nou van byna elke eiendom af die mooiste uitsig oor die vallei of berge het.”
Die nuutverkose Bestuur vir 2015 is: Helena Swart (Voorsitter), Colleen Emmenis (Onder-Voorsitter), Leni Bezuidenhout (Sekretaresse) en Stanley Carpenter (Tesourier), asook addisionele lede Steven Fourie, Loretta le Roux en Carel van der Merwe.
Vir enige navrae of inligting kan Helena by 079-528-1919 gekontak word, of stuur ‘n e-pos aan haar by tolbos@mweb.co.za.
Hardus Botha