Kennis kan nou reeds geneem word van Gansbaai Lions se jaarlikse en gewilde Lighuis tot Lighuis Bergfietswedren. Vanjaar vind dit plaas vanaf Saterdag, 7 Februarie 2015 tot Sondag, 8 Februarie 2015.
“Kom geniet twee dae se onvergeetlike ervaring in van die mooiste natuur- en kusgebiede van die Overberg en Agulhas,” sê Boats van Staden, Lionpresident. “Hierdie projek word aangebied met die uitsluitlike doel om fondse in te samel vir aanwending in ons gemeenskap waar daar indringende en ernstige behoeftes bestaan.”
Die deelnemers vertrek die Saterdagoggend vanaf die Dangerpoint Vuurtoring en spook sake kuslangs uit tot by die Agulhas Vuurtoring vir die eerste been van die wedren. Nadat hulle Saterdagaand heerlik ontspan het, pak hulle die terugtog die Sondag vir die tweede been terug na Dangerpoint aan. Inskrywing kan nou reeds op die webtuiste, www.entrytime.com, gedoen word. Vroegtydige inskrywings is van groot belang, aangesien daar slegs 200 toegelate inskrywings is.
Enige navrae kan aan Lionpresident Boats van Staden by 072-789-3627 gedoen word, of skakel vir Lion Gert Louw by 072-475-7256 (na ure). ‘n E-pos kan ook aan leo1052@telkomsa.net gestuur word.
Hardus Botha
