In Die Burger van Dinsdag, 13 Januarie 2015 skryf Jean-Pierre de Kock dat ‘n perlemoenskulp nie net ‘n “ou” asbakkie is nie. “Met ‘n streepsak vol en met die vraag, ‘doen ek werklik genoeg?’, wonder ‘n mens hoeveel tyd die stadig-groeiende spesie moontlik oor het voordat net strande vol leë skulpe ál is wat oorbly?”, is sy opmerking. Onder andere verwys Jean-Pierre na die strandgebied tussen Pearly Beach en Uilenkraalsmond waar hy en sy gesin op enorme hope perlemoenskulpe afgekom het.
“Hier waar stropers perlemoene ontskulp, in streepsakke gooi en oor die duine wegdra, staan nou ‘n berg doppe hoër as ‘n huis se dak,” sê hy. Hy sê die Departement van Omgewingsake het nie inligtingsborde opgesit (soos in die geval van walvis-maniere of die vroeë Khoisan-lewe) om te verduidelik waar die dophoop vandaan kom nie. “Daar is ook nie aantekeninge en illustrasies oor hoe stropers in die nag met flitse by die Dyereiland-reservaat rotsbanke leeg oes voordat hulle terugswem na Pearly Beach, waar hul makkers op die strand waghou nie.” Jean-Pierre verwys ook daarna dat “weens die voortgesette perlemoen-strooptogte langs die kus is, dit nou selfs onwettig is om met ‘n duikbril en ‘n snorkel hier te swem - slegs kommersiële duikers wat hul tonne uitry, het nog perlemoenkwotas.”
Maar hy sê dit was nie altyd so nie. “My ouma het ál haar kleinkinders in hierdie vlakwaters leer duik, jou leer spoeg in jou duikbril sodat dit nie opwasem nie en jou gewys hoe om seewater uit jou snorkel te blaas wanneer jy opkom.” Hy vertel met oorgawe oor onderwater se kleurryke anemone, haaibeursies, pylsterte wat verbysweef, sonstrale deur die bamboeswoude en veel meer. “En waag dit om ‘n ondermaat perlemoen uit te duik, of om jou kwota te oorskrei - die roede is ingespan!
“Só het ons die versteekte wonderwêreld in dié waters ontdek, maar met dophope soos dié, sal ons nageslagte moontlik nooit wettig die seelewe om Danger Point se kuswaters beleef nie - vir húlle sal ‘n perlemoendop dalk niks meer as ‘n ou asbakkie wees nie!”
Hardus Botha
