Gansbaai Karavaanpark se nuwe blaadjie

Die nuwe (tydelike) Bestuurder van Gansbaai Karavaanpark, Norman Stevens, het gedurende die afgelope vakansieseisoen behoorlik lewe in die karavaanpark ingepomp en die park na ‘n nuwe blaadjie laat omslaan. Groot pret en gesellighede is gereël, soos onder andere ‘n potjiekoskompetisie, ‘n waatlemoenkompetisie, ‘n Oupa & Ouma kompetisie en veel meer soos “touch rugby” en ander boeresport wat aangebied is.

Die hoogtepunt was ‘n Mnr & Mej Gansbaai Karavaanpark Kompetisie wat deur Zane Zandberg en Carla Bouwer gewen is. Hulle was saam met vriende van Robertson daar. “Dit is nie waar die pret nou eindig nie,” vertel Norman. “Ons beplan om ‘n gesellige Valentynsnaweek aan te bied.” Hierdie gesellige naweek, wat net groot pret kan wees, word gedurende die naweek van 13 tot 15 Februarie 2015 aangebied. Vrae soos: “Hoe ken jy jou metgesel?” en andere sal deel vorm van die Valentynsnaweek. Norman is tydelik aangestel nadat Charlie Nowers en sy eggenote, Liz, ná 22 jaar as Bestuurspan van Gansbaai Karavaanpark afgetree het.

Vir enige navrae, veral met die oog op die Valentynsnaweek, kan Norman by 028-384-0872 geskakel word, of stuur ‘n e-pos aan hom by gbkaravaanpark@gmail.com.

Hardus Botha

'n Bedrywige Gansbaai Karavaanpark gedurende die vakansieseisoen
Die wenners van ‘n Mnr & Mej Gansbaai Karavaanpark Kompetisie, Zane Zandberg en Carla Bouwer
Norman (tydelike bestuurder) en Jessica (administrasie) Stevens van Gansbaai Karavaanpark.