Op Saterdag, 7 Februarie, het ons liga-span op Worcester teen 'n gekombineerde span van Ceres, KoueBokkeveld en Worceley gespeel. Ons het ons vasgeloop teen 'n span wat heeltemal te sterk was vir ons. Ons kan nie eens die vreeslike warm windlose weer op Worcester as verskoning gebruik nie.
Ons eerste damespaar, Carien Gooding en Lyn Bouchier, kon darem een stel teen hulle opponente wen. Baie geluk dames. Verlede Saterdagoggend, 14 Februarie, om 9:30 het ons hier op ons tuisbane teen die span van Worcester gespeel. Dit was 'n heerlike dag (bewolk met 'n ligte windjie) vir tennis. Die span van Gansbaai het goed gespeel en hard geveg vir hul oorwinning van 5 wedstryde teenoor 3.
Baie geluk aan die pare wat hul westryde gewen het, veral aan die dames, Alta van Niekerk en Lyn Bouchier, wat albei hul wedstryde oortuigend gewen het. Baie dankie aan Eddie Botha en Elsabie Schoombie wat die span kom ondersteun het. Eerskomende Saterdag speel ons teen Montagu op hul tuisbane.
Sosiale tennis soos gewoonlik op 'n Woensdag om 09:00 by die munisipale bane en op 'n Saterdag om 14:00 by die Laerskool se bane. Almal welkom.
Tennisgroete.
Daneel Geldenhuys
