Om vir 40 jaar vir dieselfde instansie te werk en deurgaans gelukkig te wees, is ‘n voorreg wat almal nie te beurt val nie. Doreen Swartz van Herberg-aan-See Tehuis vir Bejaardes (HaS) het op 28 Februarie vanjaar afgetree en is sedert 1 Maart met pensioen.
HaS is aan die begin van 1973, sowat 42 jaar gelede gestig en Doreen is 2 jaar later op 3 Februarie 1975 as huishulp aangestel, maar is later as amptelike sjef gebruik. Sy is getroud en het 3 kinders. “Een van haar mooiste eienskappe is die mooi wyse waarop sy al hierdie jare met die inwoners gewerk het,” vertel John van Rooyen, Bestuurder: Herberg-aan-See.
“Doreen het ook ‘n uitstekende werksrekord by die Tehuis opgebou en het ook ‘n goeie ‘siekrekord’, bedoelende dat sy bykans nooit van haar siekverlof gebruik gemaak het nie.” ‘n Pragtige sertifikaat vir haar 40 diensjare is deur HaS se veteraan, Suster Linda Meyer aan Doreen oorhandig, met Anita van Dyk, Administratiewe beampte, wat meegedoen het.
‘n Mooi gebeurtenis wat Doreen seker altyd sal bybly, is die alombekende naam in Gansbaai, Die Goue Hande. Hierdie groep dames verrig al vir die afgelope 20 jaar ‘n enorme diens aan die Tehuis….en hulle naam? Die naam “Goue Hande” is met hulle stigting in 1995 deur die einste Doreen voorgestel en algemeen aanvaar.
Hardus Botha
