Om voort te bou op n Droom

 “Om voort te bou op ‘n droom”, is die passievolle wens van Lynette van Wyk van Gansbaai. “Ek is dankbaar dat die Here iemand met Staci se talente hier in Gansbaai oor my pad gestuur het om met my droom oor kinderdansers voort te gaan,” sê Lynette. “Ek glo daar is ‘n rede daarvoor en Staci beskik oor ‘n kosbare persoonlikheid met al die nodige talente daarvoor.”

Tans rig Staci, met Lynette as Mentor, twee groepe kinders, juniors en seniors, in Fit4All van Diana van Amerongen in die Great White Junction sentrum af. Lynette is ‘n voormalige en professionele balletdanseres en was op haar tyd ‘n bekende in balletkringe, waar sy vele hoofrolle in hoogaangeskrewe ballet-opvoerings wêreldwyd vertolk het.

Sy het Dance Variations Co Ministries op 4 September 2005 in die Maranatha Family Church in Ballito Bay, KwaZulu-Natal gestig, waar alle vorme van dans, soos Ballet, Ballroom, Lofdanse en ander afgerig is. Sy is nog steeds ‘n dansafrigter as lid van die Royal Academy Dancing (RAD), London, maar tree net as hulpafrigter en mentor vir Staci se groep dansers op.

“Ek noem Staci my Angel,” sê Lynette. “My passie vir dans, wat altyd aan Christelike waardes gekoppel moet wees, is te groot om op te gee en daarom is my dankbaarheid teenoor Staci se belangstelling en betrokkenheid so groot.” Woensdae word die juniorgroep (4-9 jaar) en Donderdae die seniorgroep (10-18 jaar) vanaf 16:00 tot 17:00 afgerig.

Belangstellendes kan vir Lynette by 082-480-0197 skakel, of skakel vir Staci by 081-421-1068.

Hardus Botha

Die opgewonde Junior Dansgroep tydens hulle oefensessie, met Staci Bester voor en Lynette van Wyk agter tussen hulle
Links is Staci Bester saam met die Senior Dansgroep tydens hulle oefensessie