“Nadat julle die eerste suikerkunsskepping gemaak het, sal die ‘gogga’ julle byt en sal julle ‘op vlerke vlieg’, want enigiets kan uit suiker gemaak word,” het Tess du Toit, kursusaanbieder vir Suikerkuns gesê.
‘n Groep dames van Gansbaai en omgewing, met een doring onder hulle, het belangstelling in hierdie kuns getoon nadat hulle ‘n vorige keer van Tess, wat in die Kaap woon, se koekversierings tydens ‘n Vrouediensoggend gesien het.
Sy het ook die “Bybelboek-koek” tydens die NG Kerk se 70ste Feesvieringe gebak en versier.
Die groepie kursusgangers (7) kon individuele aandag deurentyd geniet. Hulle is Deonora de Jongh, Roxaan Coetzee, Amanda le Roux, Anita Huysamen, Anita Botha en Judy Bothma. Die doring onder die rose was niemand anders as Gansbaai Superspar se Coenie Wessels nie - en teen die einde van die kursus het hy geensins teruggestaan met sy versierkuns nie. Tess se vriend, Jacques van Heerden, asook haar ma, Lindie du Toit het saamgekom vir ondersteuning en om na die verversings om te sien. Marie Reid van Marie's Boutique, Art & Beauty Shop kon weens ongesteldheid nie die kursus bywoon nie, maar het die saal vir die geleentheid geborg. ‘n Volledige “kit” met allerlei benodigdhede vir hierdie vorm van kuns was ingesluit en met Gansbaai Courant se besoeke aldaar was dit die ene konsentrasie en is daar nie eers aandag aan die kameraflits geskenk nie - nee - dit was net versiersuikerblommetjies, blaartjies en wat ookal wat in tel was. Na afloop van die kursus is daar summier gevra vir ‘n opvolgkursus.
Hardus Botha
