Sandrie Wessels van Perlemoenbaai het maar sowat 3 jaar gelede met varswaterhengel kennis gemaak, maar het lankal reeds bewys sy kan haar “vrou kan staan” agter die visstokke vir Suid-Kaap.
Onlangs, vanaf 9 tot 11 Februarie 2015, het Sandrie aan die SA’s te Bloemhof deelgeneem en dit was die eerste keer wat Suid-Kaap ‘n damespan gestuur het. “Ons het in die President A Afdeling deelgeneem en daar was ‘n totaal van 7 spanne, met 8 per span, plus die Bestuurder en Kaptein,” vertel sy. Die span waarby Sandrie ingeskakel was, het 3de geëindig. Syself het ‘n totaal van 23 visse gevang met ‘n massa van 18.23kg.
‘n Tyd gelede, 30 tot 31 Januarie 2015, het Sandrie aan die Cape Coastals deelgeneem. Dit was ‘n “nuwe” kompetisie waarby WP, OP en Suid-Kaap betrokke was. Sandrie kon beslis tevrede gevoel het, aangesien sy in die wenspan was, maar sy het ook as individu ingeskryf. Individueel het sy 2de geëindig met ‘n sak van 10 visse en ‘n massa van 9.89kg. “Dit was onplesierige weer en op die tweede dag het ons lekker natgereën,” vertel sy. Dit is verblydend om weer van varswaterhengel te hoor en Gansbaai Courant se sportblaaie kan gerus dopgehou word vir meer varswaterhengel-nuus in die toekoms.
Hardus Botha
