Watter vis daar is? Die “gewone” is maar altyd daar, en nou word bedoel die vis wat normaalweg so tussen die goeie tye gevang word. Weens die weer is die water op die oomblik hier om en by die 11, 12 grade -- en dit is beslis nie goeie nuus nie! Die gevolg is as jy nou die boot se neus die see in stoot is jou kans om goed vis te vang, maar skraal. En tog weet ek van manne wat dit nie meer kon hou nie en besluit het, koue water of te not, ek gaan see toe. En dis ‘n feit hy het maar gesukkel, maar op die ou einde tog op ‘n plekkie beland waar hy hotties gevang het wat grotendeels goed oor die een kilo was -- en daar was nie ‘n skaarste aan hulle nie. Dis mooi en rondvet-hotties. Dit is mos kwepertyd so die mooi kondisie is te verwagte, maar die vraag bly, hoekom byt die vis op een plek so goed terwyl dit ‘n gesukkel afgee op omtrent enige ander plek. Wat maak hier die verskil? Wat nou na uitgesien kan word is wanneer hierdie lekker braaivis weer goed aan die byt gaan.
Intussen lyk dit asof snoek die hasepad gekies het maar makriel was Maandag weer volop. Op hierdie stadium is daar weer onweer aan die kom en indien dit gepaard gaan met die regte wind kan enige tipe vis weer besluit om aan die byt te gaan. Daar is steeds van die baie klein kabeljoutjies in die omtrek en so nou en dan kom wys ‘n groter een dat hulle ook hier ronddwaal. My raad is, ‘n groter hoek en ‘n ordentlike aas, geduld en vasbyt. As jy daardie ou bul in die boot lig is die Kaap weer Hollands!
Enige ou wat al ’n baber gerook of sommer net in die pan gegooi het sal kan getuig dat jy nie jou neus daarvoor moet optrek nie. Die groot beswaar is gewoonlik dat jy die vis se vel moet aftrek. Nie waar nie. Lê die baber op sy rug en met ‘n skerp mes sny vanaf onder die pens daardie hele gedeelte uit, met ingeslote die kop en ook daardie gevaarlike pen agter die nek. Nou kan jy daardie vis rook, vel en al -- dié skuif nou sommer losweg af. Probeer gerus en geniet dit!
Groete, Seemeeu
