“Ek het ‘n gulde geleentheid gesien om fondse vir die dorp in te bring en terselfdertyd fondse in te samel vir BARC se broodnodige bouwerk voordat die koue winter ons tref,” vertel Adri Nel van For Pets Sake Doggy Parlour in Belville, ‘n boorling van Gansbaai. “Met behulp van Wie Maak Vir Gansbaai Lekker Facebook, het ek my idee vir ‘n BARC Basaar oopgegooi en my stoutste verwagtinge is oortref,” sê sy.
Die basaar, wat verlede Saterdag in die NGK se Kleinsaaltjie aangebied is, was veeldoelig van aard. “Ek wou nie net boufondse vir BARC invorder nie, maar wou ook die gemeenskap help.” Gansbaaiers het tafels vir hul produkte “gehuur” en winste vir hulself behou. Die basaar is baie goed ondersteun en BARC kon glimlag met bykomende fondse vir hulle bouwerk.
Adri rig graag die volgende spesiale bedankings: Henrique wat 25% van die lekkergoedtafel se winste aan BARC geskenk het; die NG Kerk Gansbaai vir die Kleinsaaltjie; die gemeenskap vir ondersteuning; diegene wat tafels gehuur het; inwoners en vakansiegangers vir hul ondersteuning. “Dit alles het tot ‘n groot sukses bygedra,” sê Adri.
Vir navrae en/of skenkings/donasies kan Annalie Jonker by 082-826-0631 geskakel word en vir diereprobleme en/of die aanneem van diere Gavin Hughes (Veldwerker) by 083-742-3903.
Hardus Botha
