Die SABC se Pensioenfonds versoek pensioenarisse jaarliks om foto’s vir hulle kalender in te stuur. “Letterlik honderde of dalk veel meer foto’s word deur SABC-pensioenarisse ingestuur, waarvan slegs 12 vir die volgende jaar se kalender gekeur word. Margi Muller van Franskraal is een van die pensioenarisse wat elke jaar ‘n foto vir die volgende jaar instuur.
Sy gebruik Gansbaai Courant (Hardus Botha) se foto’s van aktiwiteite wat sy in Gansbaai reël, aanbied of aan deelneem. Vanjaar was dit die 4de keer wat een van haar ingestuurde foto’s gekeur word en wel vir die 2015-kalender. “Ek is baie verbaas, omdat ek weet hoeveel foto’s jaarliks ingestuur word,” vertel Margi.
Die 2015 foto waarna Margi verwys, wat sy in 2014 ingestuur het, is haar Blompark Lyndanskinders wat op Vrouedag 2014 in die Gemeenskapsaal in Blompark opgetree het en deur Hardus afgeneem is. Die foto is vir die Augustusmaandblad op die kalender gebruik. Sedert 2011 se SABC Pensioenfonds Kalender, is dit vanjaar die 4de keer (2011, 2012, 2014 en nou 2015) wat ‘n foto wat Margi ingestuur het, gekeur is.
Die vorige drie foto’s was dié van 100 Lyndansers se optrede in Uilkraal Pub, ‘n foto van Strand-Veld Voetslaanklub tydens ‘n staptog (Foto: Anita Botha) en ‘n “Hoede-aand” funksie van die Birkenhead Boothengelklub.
“Wat vanjaar se foto wat gekeur is so spesiaal vir my maak, is dat dit nogal vir Augustusmaand in die 2015-kalender opgeneem is - ek en Hardus se verjaardagmaand!” het Margi gesê.
Hardus Botha
