SAPD se Flink Stappers

“Gansbaai SAPD het vanjaar vir die eerste keer die geleentheid gehad om die jaarlikse Vasbytstap vir SAPD-lede aan te bied,” vertel AO Wynand le Roux. “Gewoonlik word dit deur die Departement Korrektiewe Dienste aangebied.”

Verskeie magte en individue neem jaarliks aan die Vasbytstap deel en dit vind nou al vir die afgelope 15+ jaar plaas, met die Ladismitstap (Kannaland) en die Diasstap (Mosselbaai) as die meer populêre vasbytstaptogte. Die afstand behels 75km oor ‘n tydperk van 2 dae, met 40km vir die eerste dag en 35km vir die tweede dag. Op dag twee word daar ook ‘n halwe vasbytstap vir individue van 35km aangebied,” sê AO Le Roux.

Tydens hierdie staptog kon daar ook deelgeneem word aan ‘n 10km stap op die eerste dag. Gansbaai SAPD se flink Vasbytstappers was: AO Jackie Hildebrand, AO Micheal Vermeulen, AO Riaan Mostert, Sers Frans Groenewald, Anna-Marie Camaron en Delicia Lourens.

“’n Groot en opregte dankie aan alle borge, helpers, ondersteuners en elkeen wat ‘n bydrae tot hierdie suksesvolle Vasbytstap gelewer het - daar is te veel om op te noem,” sê AO le Roux.

Die uitslae is soos volg: 75km Veterane (gemengde span): 1ste Gansbaai SAPD (10:54). 75km Veterane (mans): 1ste Six Brothers van Kaapstad (10:34). 75km Masters (Mans): 1ste 1000km Challengers van Grahamstown (14:19).

In die 75km vir Seniors het Disa Walkers van PC Office die 1ste, 2de en 3de plekke verower, met tye van 09:52, 10:12 en 11:41.

Hardus Botha

Die “before” foto van Gansbaai SAPD, met voor vlnr AO Micheal Vermeulen, AO Riaan Mostert en Sers Frans Groenewald. Agter vlnr is Anna-Marie Camaron, Delicia Lourens en AO Jackie Hildebrand.
 Die trotse wen “after” foto van Gansbaai SAPD, met voor vlnr Anna-Marie Camaron, AO Micheal Vermeulen, Lucille Mangiagalli (oorhandiger van medaljes), Delicia Lourens en AO Riaan Mostert. Agter vlnr is Sers Frans Groenewald en AO Jackie Hildebrand.
Die Disa Walkers van PC Office se mansspan
Die Six Brothers van Kaapstad
Die Disa Walkers van PC Office se gemengde span
Die 1000km Challengers van Grahamstown, met Lucille Mangiagalli in die middel