“Gansbaai se hart klop warm vir die DA se ‘Winterwarmte’-projek,” vertel rdl Riana de Coning. “Die vlytige vingers en warm harte van die dames van Gansbaai het alle verwagtinge oortref.” Riana sê die projek is nou baie goed op dreef en dit is verstommend hoe die liefde vir hul medemens uit die gemeenskap vloei.
“Ek het selfs oproepe vanaf Pearly Beach, waar daar ook vlytig gebrei word, ontvang.” Sy sê sommige dames was ook bekommerd dat hulle net die kleuterkoppies en handjies gaan warm maak, maar wat van die lyfies? Daarom het hulle weggeval en ook truie begin brei. “Op die stadium is daar reeds 76 pragtige truitjies gebrei.” Hulle kort nog sowat 40 mussies en handskoene om aan hulle belofte aan die 3 geïdentifiseerde skole te kan voldoen, maar het gelukkig ook ‘n skenking van 44 mussies (sonder handskoene) ontvang. As gevolg daarvan kan hulle aan nog bykomende skole mussies oorhandig.
“Die projek loop op 2 Junie vanjaar ten einde wanneer die mussies, handskoene en truie oorhandig gaan word,” sê Riana. “Ek wil graag ‘n uitnodiging aan alle breiers rig om my te kontak indien hulle sou belangstel om my op 2 Junie met die uitdeel aan die kleuters te vergesel.” Sy sê die blydskap op vele kindergesiggies sal ‘n groot beloning vir die vele breiwerk wees. “Baie dankie aan almal wat tot dusver so entoesiasties aan die brei was en steeds is, maar dit is nog nie te laat vir ander om ook in te spring en die naalde te laat klap nie,” het sy gesê. Alle klaar gebreide artikels en/of wol kan by Pins and Needles verkry of afgegee word, met groot waardering vir hulle ondersteuning van die projek.
Vir navrae kan Riana de Coning by 028-388-0788 of 083-597-2781gekontak word, of stuur ‘n e-pos aan haar by rdc@axxess.co.za.
Hardus Botha
