Tydens Gansbaai Wynproegilde se April-byeenkoms het Suzette Lamprecht van Du Toitskloof Wynkelder gewys dat hulle “elke-dag-se-wyne” beslis “tops” is. “Die kelder is in 1962 met net 6 lede begin en die eerste druiwe vir die kelder is gedurende Februarie 1963 aanvaar,” het sy gesê.
“Tans is daar 22 lede-plase met 1,600 werkers en hul families wat by ons opleidings- en sosiale opheffingsprogramme baat vind.” Sy het ook na die werkers se gemeenskapsaal, 3 kleuterskole en ‘n mobiele biblioteek, wat tans 19 omligggende skole bedien, verwys. Die byeenkoms is te Lighthouse Tavern op die Dangerpoint-pad van Julia Barlow aangebied en is weer eens goed bygewoon.
Die geselligheid is met vonkelwyn afgeskop, met onder andere die volgende wyne wat daarna te proe aangebied is: 2013 Carberet sauvignon, 2014 Chenin blanc, 2013 Merlot en 2014 Sauvignon blanc, met laasgenoemde wat ‘n eerste was om in ‘n gerieflike en smal 3ltr boks bemark te word. “Die kwaliteit daarvan is presies dieselfde as die wyn in bottels, alhoewel mense steeds die verkeerde persepsie van ‘bokswyn’ het,” het Suzette gesê.
Daarna het Suzette die lede en gaste aan ‘n interessante kombinasie voorgestel: hulle Vonkelwyn gemeng met hulle Rooi Muskadel (2012) wat deur almal as ‘n smaaklike skemerkelkie beskryf is. Julia se spyskaart het seker gemaak die wynproe-aand kom tot sy volle reg: voorgereg - Meaty veggie soup; hoofgereg - Farmhouse pasta & slaai; nagereg - Arm Man se Sondag Poeding & vla. Blyke van waardering is daarna aan die Suzette en Julia oorhandig en soos gewoonlik het Gansbaai Wynproegilde se byeenkoms gesellig tot laataand aangehou.
Die volgende byeenkoms sal op Vrydag, 29 Mei 2015 in die Great White House, Kleinbaai aangebied word, met ‘n aanbieder van Barton Wynkelder.
Vir meer besonderhede rakende Gansbaai Wynproegilde kan Amanda de Vries by 028-388-0708 of 082-832-1614 geskakel word, of stuur ‘n e-pos aan haar by info@franskraalbandb.co.za.
Hardus Botha
