Barton se wynproe-strategie

 “Jy proe wat jy proe in wyn en niemand kan vir jou sê wat jy moet proe nie,” is die mening van PJ Geyer (Algemene Bestuurder, Wynmaker en Wingerdbouer) van Barton Vineyards. “Al wat ek met my wyne doen, is om die natuur te neem en dit in ‘n glas te sit en my filosofie is taste and feel, never think and do!”

Hierdie siening het PJ ook tydens Gansbaai Wynproegilde se byeenkoms gehandhaaf deur hom nie veel aan die professionele telkaart te steur nie, maar eerder te fokus op die teenwoordigers se eie ervaring van die wyne wat geproe word. Voorsitter Theuns Roodman het almal verwelkom, met spesiale verwysing na gaste en die aanbieder. PJ Geyer is ‘n gebore Vrystater (vanaf mielielande na wingerde!), maar met deeglike wynbou-ervaring, onder andere vanuit die leerskole in die VSA, Nieu-Seeland en Frankryk (by verskeie kelders), asook hoogaangeskrewe wynkelders in die Kaap. Die uitstekende Bartonwyne wat te proe aangebied is, is Barton Blanc (2014), Sauvignon Blanc (2014), Chenin Blanc (2014), Pinot Noir Rose (2014), Shiraz/Cabernet Sauvignon (2011), Merlot (2013), Surprise Blanc (2014) en Surprise Rouge (2011). Die wynproeërs het deurgaans sterk silwer- of goudtoekennings gemaak. Great White House in Kleinbaai se kombuispersoneel het gesorg vir ‘n smaaklike en wyn-komplementerende ete: Beef Symphony en Lemon Heaven as nagereg, met komplimente aan die personeel wat selfs vir ‘n gluten-allergiese gas voorsiening gemaak het. Die gebruiklike blyke van waardering teenoor die aanbieder en kombuispersoneel is gedoen en die res van die aand het gesellig verloop soos net Gansbaai Wynproegilde dit kan doen.

Vir meer besonderhede rakende die op-en-wakker Gansbaai Wynproegilde kan Amanda de Vries by 028-388-0708 of 082-577-6920 geskakel word, of stuur ‘n e-pos aan haar by info@franskraalbandb.co.za.

Hardus Botha

 ‘n Groepfoto tydens die oorhandiging van blyke van waardering, met die aanbieder, PJ Geyer, agter links