Dr Christo Barnard, Gansbaai se geliefde "Ou Dok", is weer perdfris en terug in sy spreekkamer. Dis goeie nuus vir mense wat bekommerd was omdat Dokter hierdie keer self 'n pasiënt was. Dr Christo is in Maart op sy fiets raakgery en moes saam met verskeie ernstige beserings, ook 'n tweede heupvervangingsoperasie ondergaan. Taai soos 'n ratel het hy gou ten spyte van groot pyn weer begin werk "omdat siek mense my nodig het". Na die operasie was hy egter verplig om tyd af te vat om aan te sterk. Maar nou is hy weer fris en gesond en heeldag in die spreekkamer.
Dokter Christo is baie dankbaar vir al die goeie wense, boodskappe en veral vir mense se geduld in die moeilike tyd wat verby is. "Ek weet mense het vir my gebid en dit het my sterk gemaak. 'n Baie groot dankie ook aan die span van Overstrand Medical Response wat so bekwaam na-ure vir my ingestaan het, daar was baie goeie terugvoer van mense wat elke aand na hulle deurgeskakel is," sê hy. Die bekende spreekkamer in Barnard Str 27, is oudergewoonte bedags van 8 uur tot 5 uur oop en Saterdae van 9 tot 12.
Dr Christo is ook die dorp se "na-ure dokter" wat selfs met krukke en ten spyte van sy eie pyn, steeds snags uitgegaan het om noodgevalle te behandel en nie skrik vir ons bibberwinter wanneer daar 'n krisis is nie.
Carien Crafford