Albert en Marie Potgieter van De Kelders, bekend vir hulle Feetjietuin, is die trotse oupa en ouma van Rochelle Lawson (23) wat onlangs “as ‘n verrassing” deur Netbal Suid-Afrika by die Wêreldbekergroep ingesluit is.
Rochelle is die Southern Stings se hulpverdediger en is saam met Phumza Maweni, ook ‘n verdediger, die enigste twee Wes-Kapenaars in die Proteas se 12-tal. Rochelle het haar toetsbuiging verlede maand op die Europese kampioenskap in Noord-Ierland gemaak en het slegs een dag gehad om die nasionale afrigter, Norma Plummer van haar talente te oortuig. Die Proteas neem vanaf 7 Augustus aan netbal se groot skouspel in Sydney deel. Suid-Afrika speel vooraf twee toetse teen Nieu-Seeland ter voorbereiding vir die daaropvolgende wedstryde.
Rochelle studeer tans onderwys by UNISA. Dan staan Rochelle se suster, Roux-Jeanne Lawson (19) ook nie ver agter in die “netbal-ry” nie. Roux-Jeanne het haarself al deeglik op die gebied van netbal bewys en speel tans netbal in Johannesburg vir die USSA-toernooi vir Universiteite. Sy is ‘n eerstejaar student aan die Cape Peninsula University of Technology (CPUT) en studeer Kleinhandelbestuur. Die twee kranige netbalsusters is die dogters van Len en Anne-Marie Lawson van Welgelegen en natuurlik die kleindogters van ‘n trotse Albert en Marie Potgieter.
Hardus Botha