Enna se Geelhoutboom

Wyle Enna de Lange, ‘n ou bekende in Gansbaai sedert 1951 tot en met haar afsterwe in 2007 (56 jaar), het in 1972 ‘n geelhoutboompie na Gansbaai gebring, wat almal geglo het nooit hier sal groei nie.

Die “gedoemde” boompie staan vandag steeds as ‘n yslike geelhoutboom langs Gansbaai Courant se kantore.

Enna se broer het gedurende daardie jaar ‘n onderwyspos in Oos-Londen aanvaar.

Dit was sy eerste onderwyspos en Enna het besluit om saam met haar seun, Ben de Lange te ry om haar broer weg te neem.

Sy het vriende daar gehad wat sy besoek het en kry toe dié geelhoutboompie as geskenk om na Gansbaai te bring.

“Die boompie is nie inheems aan Gansbaai met sy subtropiese klimaat nie,” vertel Ben.

“Almal het die boompie dus afgeskryf en gesê dit sal nooit hier aanpas nie.” Enna het haar nie laat afskrik nie en het haar boompie met voeding, water en baie liefde getroetel. Sy het die boompie langs die bestaande reënwatertenk geplant en dit net met reënwater natgemaak.

Vandag staan haar “eens gedoemde” geelhoutboompie soos ‘n sieraad as ‘n yslike pronkstuk langs die ou reënwatertenk. 

Hardus Botha

Wyle Enna de Lange se “gedoemde” geelhoutboom wat sy in 1972 vanaf Oos-Londen gebring het en hier geplant het
Wyle Enna de Lange