“Die belangrikste wat ons oor soveel jare heen gebind het, was ons liefde vir mekaar en om mekaar te bederf, maar veral ook wedersydse ondersteuning in voor- en teenspoed en ons het alles altyd saam gedoen,” vertel SP van Blerk (88) van Franskraal. Hy en sy eggenote, Frieda (82) is 60 jaar gelede op 6 Augustus 1955 in ‘n Duitse Kerk in Langstraat, Kaapstad in die huwelik bevestig.
Die egpaar het geen kinders nie, maar sê dat dit ‘n saak is waarmee hulle jare gelede al vrede gemaak het. SP is op 20 Desember 1926 in Malmesbury gebore, maar is op 12-jarige ouderdom saam met sy ouers na die Paarl. In sy beroepslewe was hy saam met Jan Pickard in die drankbedryf. SP is baie trots op sy spesiale toekenning, ‘n “Leadership Award” wat hy op 25 Oktober 2006 van die Pickard Group ontvang het.
Frieda is op 1 Augustus 1933 in Kaapstad gebore en bekwaam haarself later as ‘n onderwyseres aan CPUT se Mowbray Kampus, maar word later die eienaar van ‘n Bloemistewinkel in die Paarl. In 1986 tree SP af en die egpaar verhuis permanent na Franskraal, waar hulle etlike jare vantevore ‘n vakansiehuis in 1971 gebou het. “Ons het die erf kort voor ‘Daan Desimaal’ se tyd vir £450 gekoop,” sê SP.
Spesiale vriende het ‘n gesellige funksie op 1 Augustus (Frieda se verjaardag) vir hul huweliksherdenking te Uijlenes gereël, waar daar sommer heerlik saamgekuier is. Die egpaar het reeds na Golden Harvest in Sandbaai verhuis, maar kom kuier nog gereeld in hulle huis in Franskraal.
Hardus Botha
