“Oubaas Lesch het vir hom ‘n drinkhoed gekry om hom in die toekoms te help,” vertel Elba Tredoux van Overberg Kushengelklub. Hulle kompetisie van Saterdag, 8 Augustus 2015 het goeie vangstes opgelewer. Sy sê die frustrasies en teleurstelling om na die Bokke se wedstryd te kyk, het gelukkig nie na die inweegsessie deurgetrek nie.
“Zach de Wet, ‘n besoeker wat ons hoop om weer in ons midde te sien, het ‘n prag-galjoen van 1.82kg ingeweeg en dit was dan ook die grootste vis van die dag,” sê Elba. “Dit is die tweede agtereenvolgende maand wat ‘n besoeker aan die Klub met die grootste vis kon spog.”
Die swaarste sak is deur die Klub se ou staatmaker, Oubaas Lesch, ingepalm, ‘n man wat die Klub nog nooit teleurstelgestel het nie. Die man met die tweede swaarste sak was Mico Swart, wat ook gereeld sy kant bring en feitlik elke maand mooi visse inweeg. “Weer eens baie dankie aan ons getroue borg, Buitesteen Pub & Grill, asook aan Hyundai Worcester vir hulle ondersteuning,” sê Elba. “Dit is nou maar net so, die ou of vrou wat nie ‘n lyn in die water het nie, kan nie ‘n vis vang nie.
Dus, ‘n ope uitnodiging aan almal met ‘n stok om saam met ons te kom hengel.” Sy sê die gesellige saamkuier en -gesels na afloop van kompetisies, maak almal sommer vinnig deel van die gemeenskap. Die volgende maandbyeenkoms is op Saterdag, 12 September 2015.
Vir algemene navrae kan Elba Tredoux by 082-351-2304 of 028-388-0092 gekontak word. Vir hengelnavrae kan die Wedstrydsekretaris, Leibrandt van Niekerk by 082-487-3106 gekontak word, of stuur ‘n epos aan hom by bietouprops@gmail.com.
Hardus Botha
