Nadat die ligaspan van Gansbaai die finaal van die Voorgee Liga, Overberg streek, gehaal het moes hulle teen Kleinmond oor twee wedstryde uitspeel om die wenner te bepaal. Elke wedstryd het 8 punte getel.
Die eerste wedstryd het op Kleinmond plaasgevind en Kleinmond het Gansbaai oortuigend met 6½ teen 1½ geklop. Dit het beteken dat Gansbaai die tweede wedstryd met ten minste 7 teen 1 moes wen om as die wenners gekroon te kon word.
Op Saterdag 8 Augustus het die spanne mekaar die stryd aangesê. Onder die leiding van die kaptein, Jacques Nell, het die manne baie hard baklei en uiteindelik met 'n ongelooflike poging die wedstryd met 8 teen 0 gewen.
Randall Newman van die Boland Gholf Unie, was in beheer van die wedstryd.
Dit is die eerste keer in die geskiedenis van Gansbaai Gholfklub dat dit vermag kon word.
Die span gaan nou teen die wenners van die ander 3 streke uitspeel om die algehele Boland wenners te bepaal.
Ons wens die span alle sterkte toe.
André Roos