Wie is reg?

Vanaf die vorige naweek het dinge versleg wat snoek-vangste betref en dit is baie manne se mening dat hierdie visse al padgegee het of dan besig is om te verkas. Moontlik is dit so, maar daar is tog ‘n moontlikheid dat die aanname verkeerd kan wees. Aangesien die weer die oorsaak was dat min bote dit op see wou waag sal daar maar na die wille water gewag moet word om te sien wat die snoekstorie is. Ek dink dat ek die stertkant van die vangery beleef het toe ek by Gansbaai uit was, maar daar was iets baie eienaardigs waarna ek wil verwys. Terwyl ons vir ‘n heel ruk op die snoek gewag het om te byt (en nie eers een pluk gehad het nie) was dit tog eienaardig om so baie vis op die visvinder te gewaar. Indien dit nou aan Kleinbaai se kant was kon mens nog redeneer dat die vis wat so onder die boot ronddwaal dalk ander vis, soos byv. silwervis was, maar nie aan Gansbaai se kant nie. Wat ons wel gesien het was hoe ‘n rob met ‘n snoek in sy bek bo die water verskyn. Dit laat jou die afleiding maak dat die snoek wel teenwoordig was maar net nie wou byt nie. My aanname is dalk verkeerd maar indien dit wel korrek is, is die snoek miskien tog nog hier en met die verandering van weer  --  wie weet?

Ons hét een van daardie monsterhaaie gewaar wat die boot baie klein laat lyk het, en die manne, behalwe vir ‘n senuweeagtige laggie, maar aan die stil kant gehou het. Veral toe die ou skurwerug blykbaar baie geheg aan ons geraak het!

Die manne wat nog van hierdie nuwe bootradio’s moet aanskaf moet maar beginne varkoor gooi waar om dit in die hande te kry. Die tyd raak min. Dis ongelukkig ‘n redelike bedrag wat uitgehaal sal moet word, so maak maar voorsiening daarvoor. Dis goeie raad om advies in te win by iemand wat regtig weet waaroor alles gaan, want dit blyk meer gekompliseerd te wees as wat ons gemeen het. Die persoon wat nou die bote se toetsing doen is mnr. Norman Kenn (tel.071 8982470) en hy is die regte man om by navraag te doen hieroor. Ons  sê dankie vir sy bereidwilligheid.

Tot volgende keer, Seemeeu

Seedinge  2_200x180_crop_100_1