SABC 2 se Showville-program sal vanaf November vanjaar gebeeldsend word. Die span is tans in ‘n proses om dorpe te besoek vir deelname aan die program. Gansbaai is sommer vroeg volgende week aan die beurt en talente sal uitgehaal en gewys moet word vir die vale. Die verskeidenheids-talentskou, met 4 optredes waaruit gekies gaan word, bestaan uit sang en dans en enige ander verskeidenheidskonsert-talente. Dit word professioneel deur Rob van Vuuren en Bontle Modiselle aangebied. Oudisies sal op Donderdag, 3 September by Laerskool Gansbaai plaasvind.
Op Vrydag, 4 September sal ‘n “kortlys” opgestel word, terwyl almal bygestaan en gehelp sal word met korrekte optredes. Op Saterdagaand, 5 September sal ‘n verskeidenheidskonsert by die laerskool aangebied word om die finale wenner aan te wys - met ‘n hoofprys van R10,000. Die wenner sal dan ook deel wees van November se uitsending van die program. Enkele voorwaardes word gestel, soos ‘n maksimum van 4 lede per groep en deelnemers moet ouer as 18 jaar wees.
Vir meer besonderhede, verdere inligting en inskrywingsvorms kan Gansbaai Toerisme by 028-384-1439 gekontak word. Die webtuiste: www.showville.co.za kan ook besoek word.
Hardus Botha
