Laerskool Okkie Smuts in Stanford spog met nuwe bome as gevolg van AfriForum se nuwe inisiatief in die Overstrand. “Overstrand AfriForumtak vat vanjaar hande met Whale Coast Conservation en ons verskaf aan hulle die kompos, beenmeel en dies meer vir boomplantmaand,” sê Elmarie van Dalen, voorsitter: Overstrand AfriForum.
“AfriForum het sy nuwe inisiatief, Boomplantmaand, op Dinsdag, 1 September 2015 bekendgestel om die belangrikheid van bome en hulle erfenis te benadruk.” Vanjaar fokus hulle op die volgende boomspesies: Bosvaderlandswilg / Forest Bushwillow (Combretum krausii) en die Wildepieterseliebos / Parsley tree (Heteromorpha arborescens). Riaan Conradie van Gansbaai AfriForum het ‘n soortgelyke boomplant-geleentheid by Gansbaai Academia gereël. Volgens Julius Kleynhans, AfriForum se hoof van omgewingsake, is die inisiatief ʼn vars briesie wat deur die land gaan waai.
“Mense regoor Suid-Afrika vier lenteweek gewoonlik gedurende die eerste week van September - AfriForum wil egter die hele Septembermaand aan bome toewy,” het Kleynhans gesê. 130 AfriForum-takke landswyd gaan meer as 1,000 bome deur die verloop van die maand plant. Die takke gaan verskeie besighede, gemeenskappe en skole besoek om oor die belangrikheid van bome te praat, terwyl uitheemse uitwissingsprojekte ook geloods gaan word.
‘n Onlangse studie in New York het bewys dat die toevoeging van ‘n addisionele 343 bome/km² die tempo van asma met tot soveel as 24% - 29% verlaag by kinders tussen die ouderdomme van 4 en 5 (Lovasi et al, 2008). Navrae rakende Overstrand AfriForum kan aan Elmarie van Dalen by 079-366-1000 gerig word.
Hardus Botha
