Verlede Saterdag voor Gansbaai Superspar was dit die ene rep en roer soos wat ‘n klompie vrywillige dames al blaffende pannekoek ten bate van BARC gebak en verkoop het. “Dit was ‘n reuse sukses en al ons aangemaakte deeg is opgebruik,” vertel Annalie Jonker van die Birkenhead Animal Rescue Centre (BARC) in Gansbaai. Gesels mens ernstig oor BARC met Annalie, duik daar ‘n moedeloosheid op oor vele probleme, maar van handdoek ingooi is daar by hierdie “BARC-Ystervrou” nie sprake nie, selfs al kry sy nie die krediet wat sy verdien nie. Die effektiewe bestuur van BARC is vir haar ‘n passie in die lewe. As hulp by die hokke is Michelle Philander in Januarie vanjaar aangestel. Hierdie entoesiastiese dame se verantwoordelikhede strek egter veel verder as die skoonhou van hokke.
Tans is daar nie ‘n permanente Veldwagter nie en BARC het weer ‘n advertensie vir een elders in hierdie uitgawe van Gansbaai Courant geplaas. Intussen help BARC se kannie-dood staatmaker, Antonie Jordaan, weer as Veldwagter uit, maar is terselfdertyd druk besig met die vergroting van BARC se Cattery (kattehok), asook addisionele hondehokke wat gebou moet word. Die tweedehandse BARC Winkel op die hoek van Hoof- en Korporasiestrate (langs Kekkel en Kraai) kan gerus besoek word, maar is ook afhanklik van die skenking van tweedehandse items. Vir diereprobleme en/of die aanneem van diere kan BARC se bestaande selnommer by 083-742-3903 geskakel word. Michelle sal antwoord en van hulp mees, met Antonie wat in meer ernstige gevalle van hulp sal wees.
Vir algemene BARC-navrae, asook die vakante Veldwagterspos, kan Annalie Jonker by 082-826-0631 geskakel word.
Hardus Botha
