Proudly Tannie Roza!

‘n Ma, vrou, werkgewer en vriend is net ‘n paar voorbeelde om vir Roza Rabe te beskryf. In die laaste 7 maande was sy ‘n inspirasie vir die 2015 Melodrama groep. Soos almal weet is haar man, Raymond, in die hospitaal vir ‘n seldsame siekte en veg sy weer eens teen kanker. Alhoewel sy haar tyd tussen die hospitaal, werk en chemo moes verdeel het sy elke Maandagaand opgedaag vir oefening, met ‘n glimlag op haar gesig en ‘n behulpsame woordjie vir die spelers. Op Saterdag 10 Oktober 2015, die Melodrama se Gala aand, was Roza Rabe een van ons eregaste en agter die skerms het dit woes gegaan met hare wat waai ten bate van kanker. Die spelers het almal saamgestaan en die sowat 30+ wat wou, het hulle hare afgeskeer. Met ‘n groot gejuig het die mans met niks hare en wit kopvelle die verhoog trotseer. Daar was selfs ‘n paar dames wat stukkies hare verloor het. Met hierdie gebaar bevestig ons dat ons bankvas agter jou staan, Tannie Roza, en elke tree van hierdie pad saam met jou gaan stap.

Roza Rabe het versoek dat die volgende geplaas moet word (Red.): “Ek wil graag die groep jongmense gelukwens met Melodrama 2015. Ek geniet julle en julle is almal pragtige mense. Julle is vir my ‘n inspirasie en nie ek vir julle nie. Ek koester ook groot respek teenoor julle met verwysing na die pragtige liefdestake wat julle met die Melodrama Kinder Trust se fondse verrig.”

Gansbaai Melodrama groep 2015

Roza Rabe staan hier tussen twee junior Melodramadeelnemers wat hulle hare ook afgeskeer het, AJ Bosch (links) en Adrian Hage (regs)