Die Birkenhead Boothengelklub het weer eens vir ‘n prestige jaarafsluiting gesorg. Die hoogtepunt is natuurlik die trotse boothengelaar-wenners wat met trofeë en sertifikate beloon is. (Gansbaai Courant, Donderdag, 26 November 2015). Maar veel meer steek in die funksie as net prysoorhandigings.
Dit is jaarliks ‘n prestige geleentheid wat met gesellige saamkuier en ‘n dans gepaardgaan, met ‘n ete vanuit die boonste rakke en Jan Lourens wat die Musiekfabriek byna laat “oorwerk” het. Daar is jaarliks ook enkele ander trofee-wenners. Lorraine Fourie (sekretaris) is vir haar onbaatsugtige werk met die Raymond Rabe Voorsit-terstrofee vir Verdienstelikheid beloon. Lede John en Tollie Thompson is vereer as die paartjie met die beste sosiale bydrae tydens funksies. Herman Taljaardt het ‘n bottel whisky ontvang vir sy gereelde instaan in die kroeg tydens die kroegman se afwesigheid, met sy eggenote, Maureen, wat blomme ontvang het. Dan is daar ook uitgesien na die trekking van lootjies wat gedurende die jaar vir ‘n yslike 5ltr bottel rooiwyn verkoop is.
Roza Rabe was die wenner, maar het die bottel teruggeskenk om opgeveil te word. Ben Uys het as afslaer opgetree en die bod is op Leon Engkle vir R2,000 toegeslaan. Die bottel was ‘n aanvanklike geskenk deur Johan En Suzette Wiese wat dit sowat 10 jaar gelede by ‘n vriend in Stellenbosch gekry het.
Die klub se Algemene Jaarvergadering is die voorafgaande aand gehou, met die bestuur wat bykans onveranderd gebly het: Philip Fourie (voorsitter), Manie van Dyk (ondervoorsitter), Lorraine Fourie (sekretaris), Johan Wiese (tesourier/kroeg), Jean Downing (veiligheidsbeampte/wedstrydsekretaris), Hardus Botha (skakelbeampte/Redakteur Die Tekkel-Boks) en Steve Muller (instandhoudingsbeampte).
Die eerste boothengelkompetisie vir 2016 vind reeds op Saterdag, 5 Desember 2015 plaas en Jean Downing kan vir navrae by 076-840-3393 geskakel word. (Foto’s: Anita Botha, Thys Fourie en Herman Taljaardt)
Hardus Botha