Die 6 streke van Gansbaai NG-Kerk in en om Gansbaai tot by Pearly Beach en Baardskeerdersbos, asook die VGK-gemeente in Blompark, wat as ‘n 7de streek gesien word, alhoewel hulle onafhanklik funksioneer, se jaarlikse gesamentlike Nagmaalsvieringe het onlangs in Gansbaai se kerkgebou plaasgevind. Die verrigtinge het begin met die aansteek van seremoniële kerse deur al 7 streke se verteenwoordigers. “Daar is ‘n spreekwoord wat lui: Jy kan jou vriende kies, maar nie jou familie nie,” het ds Dirk van Dyk sy boodskap begin. “As dit waar is van ‘n familie, dan is dit nog meer waar van die kerk in die sin dat ons nie kies wie saam met ons aan die kerk behoort nie, maar dat dit die besluit van die Here is.”
Die tema van ds van Dyk se prediking het op eenheid gefokus. Ef 4:3-5: “Lê julle daarop toe om die eenheid wat die Gees tussen julle gesmee het, te handhaaf deur in vrede met mekaar te lewe. Daar is net één liggaam en net één Gees, soos daar net één hoop is waartoe God julle geroep het. Daar is net één Here, één geloof, één doop, één God en Vader van almal….”
Ds van Dyk het ook gesê: “Die Heilige Gees voeg mense saam in die kerk en plaas hulle in ‘n verhouding met mekaar. Ons moet hierdie band wat deur die Gees gesmee is, bewaar en bevorder. Die eenheid tussen gelowiges lê hier in gebed in God se genadige verkiesing buite ons eie besluit.” Ds van Dyk het klem gelê op drie woorde wat hierdie gesindheid van eenheid handhaaf en bevorder: nederigheid, vriendelikheid en geduld, ingesluit die Liefde van 1 Kor 13 wat al drie hierdie woorde duidelik omskrywe.
Hardus Botha
