Burgemeester “dirigeer” Philharmoniese Orkes

Overstrandse Uitvoerende Burgemeester, Raadsdame Nicolette Botha-Guthrie het die volledige Kaapstadse Philharmoniese Orkes op Woensdag, 16 Desember 2015 in Gansbaai Primêr se skoolsaal “gedirigeer” - en haarself nogal goed van haar taak gekwyt - sommer met die regte liggaamshouding en korrekte bewegings met die dirigeerstokkie en al.

Die geleentheid was ‘n gratis optrede deur die bekende Cape Town Philharmonic Orchestra, met Anton Phillips as dirigent vir Versoeningsdag. Dit het deel gevorm van die Grootbos Orchestral Charity Performance later die aand te Grootbos Natuurreservaat. Raadsdame Botha-Guthrie het die uitvoering in die skoolsaal bygewoon en sy het die geleentheid gekry om die orkes te dirigeer. Die Heavenly Quartez, vier jong tenore van Khayelitsha saam met die betowerende stem van Nolufefe Mzondi, het, naas klassieke liedere, die gehoor aan hul voete gehad met ‘n verskeidenheid van Afrikaanse Volksliedjies.

“This community concert is sponsored by the National Lotteries in its drive to reach rural communities to reach people without opportunity to access top class entertainment. The Orchestra is dedicated to Outreach and Education by extending their reach to children, youth and adults who otherwise never would be able to hear a world renowned orchestra perform,” het die seremonimeester gesê. Dit is presies wat daar gebeur het: veral die groot hoeveelheid leerders en jongmense het in verwondering na die orkes gestaar en was opgewonde oor hul optrede.

Hardus Botha

Raadsdame Nicolette Botha-Guthrie in aksie met die dirigeerstokkie voor die Kaapstadse Philharmoniese Orkes
Vlnr is Rdl Riana de Coning, Brandon Phillips (dirigent) en Raadsdame Nicolette Botha-Guthrie