Kort ná die afsluiting van die NG Kerkkoor se jaar, is hulle genader vir optrede by Gansbaai Family Church. Die beskikbare koorlede het ingestem en bygedra tot ‘n puik erediens. Hulle het soveel koorliedere gesing dat dit bykans die atmosfeer van ‘n Kerssangdiens geskep het. Soos oudergewoonte het die koor onder leiding van Aletta Lochner as dirigent en Annaline Reinke as begeleier opgetree. Jack White met sy trompet, asook Chris van Zyl met sy kitaar het verdere luister aan die erediens verleen. Chris Thompson van die gemeente het die verwelkoming behartig en daarna vir past Gavin Leverton van Kaapstad aan die woord gestel.
“Dit is interessant dat die koor verlede jaar ook hier opgetree het toe ek die boodskap gebring het,” het past Leverton gesê. “Ek is baie lief vir koorsang en dan roep Jack se trompet ook vele herinneringe by my op, aangesien ek op skool trompet in die skoolorkes gespeel het.” Past Leverton het sy boodskap op ‘n insiggewende wyse vanuit ‘n ander hoek aangebied. “Almal ken die verhaal voor en na Kersfees (geboorte van Christus),” het hy gesê. “Dit is egter belangrik om reeds met Christus se geboorte op sy wederkoms te fokus, dit is waarom een van sy name Verlosser is. Indien ‘n mens na die wêreld kyk, is dit ‘n hartseer plek om in te woon.” Hy het die skeiding tussen God en mens uitgelig wat reeds in die paradys begin het.
“Met Christus se koms word die geleentheid geskep om God en mens weer nader aan mekaar te kry en al wat ons nodig het om gered te word, is die genade van God. Dus mag ons nie toelaat dat enige iets anders die Kersboodskap oorskadu nie.” Die koor het met Stille Nag, Heilige Nag afgesluit, waarna daar gesellig saamverkeer is met heerlike verversings. Besoekers is welkom om Gansbaai Family Church se Eredienste om 09:00 by te woon, asook hulle Kersdiens om 09:00 op Kersdag.
Navrae kan aan John Collings by 028-384-3820 gerig word.
Hardus Botha
