Twee Belge, Geert en Bettie Willems is oorspronklik van België, maar woon tans in De Kelders. Hierdie egpaar met “oop harte” het ‘n tyd gelede ‘n welwillendheids-besoek by Gansbaai Primêr afgelê en uit hul eie hulp aangebied waar daar nood kon wees.
Die behoefte aan skryfbenodigdhede is aan hulle genoem. “As deel van hulle projek het hulle daarna hulle vriende in België genader. Hierdie kosbare vriende het besluit om fondse vir skryfbenodigdhede te skenk en die hele projek is via Facebook gekoördineer,” vertel Gansbaai Primêr se skoolhoof, Tommy Wilson.
“Hulle het daarin geslaag om genoeg geld in te samel om 600 volledige stelle skryfbenodigdhede aan te koop.” Hierdie stelle het onder andere penne, potlode, liniale en uitveërs ingesluit. Dan was daar ook ander items soos klei, inkleurpotlode en sakrekenaars. Tommy sê die Gr 5 leerders het op eie inisiatief Kerskaartjies gemaak wat die Willems-egpaar gebruik het om aan hul vriende in België te stuur.
Die Adjunk-hoof, Neil Pedro en ‘n senior onderwyser, Mareesa de Villiers het die ontvangs van die donasie saam met Tommy bygewoon. “Ons by Gansbaai Primêr is baie dankbaar vir hierdie ondersteuning vanuit België, asook vir die goedhartigheid van Geert en Bettie Willems,” het Tommy gesê.
Hardus Botha
