Stranddiensspan is Tops

Die Stranddiensspan wat jaarliks ‘n groot verskeidenheid van aktiwiteite te Uilenkraalsmond Vakansie-oord aanbied, kan met reg as “Tops” beskryf word. Vanjaar het hulle weer eens ‘n vol program vanaf 14 - 31 Desember 2015 aangebied, waarna hulle op 2 Januarie 2016 vanaf 11:00-11:30 sal groet voordat hulle weer na hul onderskeie bestemmings vertrek. Aktiwiteite vir die jongmense soos speletjies, koffiekroeë, poppekasvertonings, strandkasteelkompetisie, boeresport, die aanwys van Mnr en Mej Uilkraal en veel meer, te veel om op te noem, is aangebied. Tydens die NG-gemeente se Kersdiens het hulle, ongeag dat Kersdag hul afdag was, ingestem om vir die klank by die Uile Kroeg in te staan. Richard Mouton en Henko van Zyl het vroegoggend reeds alles in gereedheid gebring en na afloop van die twee dienste weer hul toerusting gaan haal.

Tydens hierdie diens het Pieter van der Merwe, musiekdosent van Kleinbaai vrywillig ingewillig om die klawerbord te speel, met Jason Blunden en Lezelle Jacobs van die Uile Kroeg wat goedgunstiglik die saal beskikbaargestel het en stoele uitgepak het. Dan het die Stranddienstespan se Potjiekos Kompetisie ook suksesvol verloop. Die kompetisie is by Uilenkraalsmond aangebied, waar hierdie jaarlikse gedugte span hul verskeidenheid van aktiwiteite aanbied. Die wenners was Handri en Renata, met Sylvana Janse van Rensburg in die 2de plek en die Duppies in die 3de plek. Bravo aan die Stranddienstespan onder leiding van Günther Hüsselmann en bygestaan deur Shirné Nel en Henro Vorster. Julle sal altyd meer as welkom hier wees!

Hardus Botha

Die Stranddiensspan se Potjiekos-wenners, met Renata (links) en Handri (regs) en die Stranddiensspan se Shirné Nel in die middel
Die wenspan van die Sandkasteelkompetisie met hulle kop van ‘n Grootwithaai, wat deur die Stranddiensspan gereël is