“Ek was nog altyd op reis: na mense, dorpe, lande. My kitaar was my paspoort oor vele grense; my woorde die sleutels wat baie deure laat oopswaai het. Daar was ‘n tyd toe ek gedink het die pad sal nooit ophou nie. Maar nou weet ek van beter….” - Randall Charles Wicomb, bekende volksanger, liedjieskrywer en kopersmid, is op 30 Januarie 1949 gebore en op Sondag, 27 Desember 2015 in die ouderdom van 66 jaar in sy huis in Stellenbosch oorlede, ná ‘n lang stryd teen prostaat-kanker.
So min soos 6 maande gelede op 8 Augustus 2015 het ‘n reeds ernstig-siek en maer Randall in die Pretoriussaal tydens die NGK se Vrouediens-byeenkoms opgetree. Hy het opvallend stadig geloop en beweeg, maar met sy kenmerkende sang het niks geskort nie. Hy het besluit op ‘n verskeidenheid van liedjies wat sy volle sangloopbaan weer-spieël het en het die dames behoorlik betower. (Gansbaai Courant, Donderdag, 13 Augustus 2015).
Nog ‘n Gansbaaier, Johan Coetzee van Naledi Uitgewers wat in De Kelders woon, was intens by Randall betrokke. Naledi was die uitgewer van Randall se Outobiografie, Kleur - my Lewe, my Lied (Amos van der Merwe). Die boek is maar onlangs bekendgestel en Randall vertel die volle en ware verhaal van sy lewe vanaf geboorte. Dit beslaan 173 bladsye, plus 24 bladsye (26 hoofstukke) met gekleurde familie- en gesinsfoto’s.
Randall word as een van die ikone in die Suid-Afrikaanse musiekbedryf beskou en het oor meer as vier dekades grensverskuiwende werk met sy toonsettings en vertolkings van Afrikaanse volksliedjies gedoen. Hulde is van oral oor aan hom gebring.
Hardus Botha
