“Die Kerstyding is reeds gebring; geskenke afgelewer en liedjies gesing; gewyde oomblikke bring hulde aan Hom; wat was, wat is, wat weer kom. Die Kerstyding is ons Christusfees; ryk aan gedagtes wanneer ons die verhaal lees; van Hom wat vir die wêreld gebore is; om ons te bevry, te verlos, Ewigheid nie te mis. Die Kerstyding bring ‘n boodskap; vir elkeen wat met Hom ‘n pad wil stap; al is daar distels en dorings in jou pad; Hy sal jou help, jou dra, jou lei na die Hemelstad.” - Die Kerstyding, op haar kenmerkende wyse gelees deur die welbekende Wilna Snyman.
Dit was tydens ‘n puik georganiseerde Kerssangdiens deur Petrus du Preez van Pearly Beach NG-gemeente, bygestaan deur Marie Klaassen. Die program het sonder onderbrekings met gemeentesang, voorlesings, gedig-voorlesings deur Wilna Snyman, video-opnames van gepaste liedere deur onder andere André Rieu en kinders met brandende liggies verloop.
Die knap musiekbegeleier was Annaline Reinke, met Jack White en sy bekende trompetgeskal wat verdere luister aan die optredes verleen het. Petrus self het enkele verse van Welkom o stille nag van vrede gesing. Anita Botha was verantwoordelik vir ‘n prag-versierde kerk, met hulpverlening deur haar staatmakers, Hennie en Magda Swart, met Marie Klaassen wat ook vir puik werk agter die tru-projektor gesorg het.
Die verrigtinge is met Stille nag, Heilige nag afgesluit, met ds Willie Kotze wat ‘n gebed gedoen het en die seëngroet uitgespreek het. Met die uitstap van die gemeente is daar na die welbekende lied, Go tell it on the mountain deur André Rieu se orkes en koor gekyk en geluister.
Hardus Botha